У Літве абвінавачваюць у генацыдзе чэкіста, які ваяваў з "ляснымі братамі"

Справу аб генацыдзе ў 1951 годзе змагароў за свабоду Літвы завялі на 82-гадовага літоўца, ветэрана органаў савецкай дзяржбяспекі.  Паводле звестак пракуратуры Клайпеды, пенсіянера падазраюць у тым, што летам-восенню 1951-га ён паказаў супрацоўнікам МДБ месцазнаходжанне некаторых антысавецкіх партызанаў у Таўрагскім раёне Літвы.

Літоўскія законы трактуюць яго ўчынак як генацыд, бо партызаны альбо загінулі, патрапіўшы ў засаду, альбо былі ўзятыя ў палон і апынуліся ў зняволенні. Тэрміну даўнасці па такіх злачынствах у Літве няма, паведамляе БЕЛТА.

Дарэчы, Клайпедская пракуратура цяпер расследуе аж 13 падобных справаў. Усім былым чэкістам і памагатым савецкіх карных органаў пагражае пажыццёвае зняволенне.