У Мінску 80% неплацельшчыкаў ЖКГ працуюць у дзяржустановах, у тым ліку ў ЖКГ

У Мінску створаная база ўліку неплацельшчыкаў за камунальныя паслугі па месцы іх працы.  Як паведаміў БЕЛТА генеральны дырэктар "Мінскай гарадской жыллёвай гаспадаркі" Ўладзімір Рэентовіч, каля 80% злосных даўжнікоў працуе ў дзяржустановах. Дарэчы, у "чорны" спіс трапілі і работнікі жыллёвых службаў. Як заявіў спадар Рэентовіч, да канца лютага спісы з прозвішчамі і адрасамі плануецца разаслаць па прадпрыемствах і арганізацыях горада. Камунальнікі спадзяюцца, што кіраўнікі прымуць меры, і падначаленыя пагасяць абавязкі перад ЖКГ.

У цяперашні час на балансе "Мінскай гарадской жыллёвай гаспадаркі" налічваецца 609 тысяч кватэр, з якіх пазыкі па аплаце паслуг ЖКГ маюць каля 5%. На працягу года памер пратэрмінаванай запазычанасці вагаецца ў межах 5-6 млрд рублёў.

Сёлета ў сталіцы вырашана перасяліць злосных неплацельшчыкаў з пяці кватэр у жыллё меншай плошчы. У суды пададзена больш за 130 пазоваў на высяленне даўжнікоў.