На “Паліміры” вызначаныя папярэднія прычыны аварыі, калі былі загінулыя

У Наваполацку вызначаны папярэднія прычыны аварыі, якая адбылася на хімічным прадпрыемстве “Палімір”. Нагадаем, што 12 чэрвеня ў выніку ўцечкі сінільнай кіслаты там загінулі два чалавекі. Адзін з іх — слесар-рамонтнік, другі — майстар службы па эксплуатацыі і рамонту. На іх трапіла сумесь ацэтона і сінільнай кіслаты.

Першы памёр у бальніцы ў той жа дзень, за жыццё другога лекары змагаліся яшчэ чатыры дні, але выратаваць яго не здолелі.

Вось што даведаўся пра высновы камісіі наш карэспандэнт Валеры Зуеў:

“Як вызначыла спецыяльная камісія, якая праводзіла расследванне здарэння, у трагедыі было некалькі прычын. У людзей, якія загінулі, не было сродкаў індывідуальнай абароны, небяспечныя работы праводзіліся без афармлення допуску”.

Да таго ж, камісія знайшла і недапрацоўкі ў канструкцыі трубаправода з сінільнай кіслатой. Расследванне няшчаснага выпадку на “Паліміры” працягваецца.