Палітвязень Алесь Бяляцкі атрымаў узнагароду абаронцы правоў чалавека
Яна заснаваная Дзярждэпам ЗША і адзначае асобаў, якія ва ўмовах рэпрэсіяў, "паказалі выбітную мужнасць і вядучую ролю ў абароне правоў чалавека і дэмакратыі".
Сёлетнюю ўзнагароду Бяляцкі падзяліў з угандыйскай Кааліцыяй грамадзянскай супольнасці ў пытанні правоў чалавека і канстытуцыйнага закону, адзначае Радыё Свабода.
Нагадаем, праваабаронца Алесь Бяляцкі быў асуджаны ў лістападзе 2011 года на 4,5 года калоніі ўзмоцненага рэжыму з канфіскацыяй маёмасці. Яго звінавацілі ў нявыплаце падаткаў з замежных рахункаў. Насамрэч грошы на тых рахунках прызначаліся на праваабарончую дзейнасць. Краіны ЕС, ЗША, праваабаронцы лічаць яго палітвязнем і патрабуюць неадкладнага вызвалення.
Бяляцкі ў цяперашні час знаходзіцца ў бабруйскай калоніі, працуе на швейнай вытворчасці, дзе займаецца пакаваннем гатовай прадукцыі.
Фота — bymedia.net
