У Бабруйску GPS-маячкі мае толькі кожная пятая маршрутка
Між тым Бабруйскі гарвыканкам выдаў адпаведную пастанову яшчэ два гады таму. Агулам сістэму GPS-сачэння маюць 28 з 157 маршрутак.
Спярша ў маршрутчыкаў, якія выканалі загад гарвыканкама, пачаліся праблемы з работай прыбораў. Фірма-пастаўшчык, якая перамагла ў тэндэры на пастаўку GPS-маячкоў, паставіла няспраўныя прыборы, паведамляе Бабруйскі рэгіянальны партал.
Але і пасля выпраўлення памылак у працы GPS-навігатараў іх не спяшаюцца ўсталёўваць нават тыя прадпрымальнікі, якія падпісалі адпаведную дамову і атрымалі ліцэнзію.
У гарвыканкаме не хочуць адмаўляцца ад ідэі ўсталяваць прыбор сачэння на кожную маршрутку. У прыватнасці, улады Бабруйска плануюць скарыстаць "адміністрацыйны рэсурс": неўзабаве маршрутчыкам давядзецца падпісваць дадатковыя дамовы на ажыццяўленне перавозак.
