У Гродне на трое сутак затрымалі журналіста Андрэя Пачобута

Следства палічыла, што калі Андрэй Пачобут з'едзе з Гродна, гэта будзе замінаць правядзенню следчых дзеяннях паводле заведзенай на яго крымінальнай справы, паведамляе Радыё Свабода.

Карэспандэнт польскай “Газеты выборчай” збіраўся ехаць у Мінск для ўдзелу ў відэаканферэнцыі з дэпутатамі Еўрапарламента.

У часе гэтай відэаканферэнцыі ён меў распавесці пра тое, як яго пераследуюць беларускія ўлады. Увечары 6 красавіка Пачобут паведаміў па тэлефоне “Газеце выборчай”, што яго затрымалі і павезлі ў абласную пракуратуру. Там яму ўручылі позву з выклікам на допыт на 7 красавіка.

Журналіст заявіў, што гатовы прыйсці ў любы іншы дзень, але не ў гэты. Праз 15 хвілінаў выявілася, што Пачобут затрыманы зноў, паведамляе БелаПАН са спасылкай на “Газету выборчу”.

Нагадаем, што супраць Андрэя Пачобута распачалі крымінальную справу паводле артыкула 368 Крымінальнага кодэксу (абраза прэзідэнта).