Ва Украіне ўспыхнулі самыя масавыя акцыі пратэсту за апошнія 5 гадоў

Хваля прадпрымальніцкага пратэсту супраць Падатковага кодэкса ўскалыхнула Украіну. За апошнія 5 гадоў – гэта самая масавая акцыя. Толькі каля Вярхоўнай рады ў Кіеве 18 лістапада сабралася больш за 50 тысяч прадпрымальнікаў.

Прадстаўнікі малога і сярэдняга бізнесу не задаволеныя тым, што новы кодэкс дае магчымасць правядзення пазапланавых праверак і арышту маёмасці прадпрымальніка без рашэння суда.

Парламенцкая большасць метадычна адхіляла ўсе папраўкі апазіцыянераў і аднастайна галасавала за ініцыятывы прадстаўнікоў партыі ўлады. У выніку кодэкс быў прыняты.

"Калі яны не пагодзяцца ні на якія кампрамісы, то нам будзе кепска. Апроч абутку і адзення нам нічым гандляваць будзе нельга. Мы не будзем мець права гандляваць, бо з'яўляемся трэцяй асобай. Цяпер гандляваць змогуць толькі вытворцы і аптавікі, а мы наогул – ніхто", – абураныя гандляры рэчавых рынкаў.

Тым часам на пляцоўку перад парламентам ляцелі капейкі, памідоры і туалетная папера. "Кожнаму дэпутату – мінімальны заробак!", – скандзіравалі прадпрымальнікі.

"У нас свабодная дэмакратычная краіна, таму тыя, хто пабачыў мінусы ў кодэксе выйшлі на вуліцу і заявілі пра сваю нязгоду. Урад з павагай ставіцца да ўсіх грамадзян, да ўсіх законных інтарэсаў, але я падкрэсліваю, што рашэнне мы прымаем у інтарэсах пераважнай большасці нашага грамадства. Так, шматлікім прадпрымальнікам давядзецца перабудаваць сваю дзейнасць у адпаведнасць еўрапейскім цывілізаваным нормам, але робіцца гэта для таго, каб выйграла усё грамадства, а эканоміка атрымала магутныя стымулы для прыскоранага развіцця і дазволіла нам выйсці на прынцыпова новую якасць жыцця", – заявіў украінскі прэм'ер Мікола Азараў на пасяджэнні ўраду.

Пасля прыняцця дакумента прадпрымальнікі абяцаюць дзейнічаць больш радыкальна і размаўляць з уладамі мовай ультыматумаў.

"У выпадку, калі нашы патрабаванні не будуць выкананыя, мы, па-першае, распачнём агульнанацыянальны страйк зусім іншага ўзроўню і зусім іншага характару. Па-другое, мы ўжо сёння прынялі рашэнне, што мы ствараем каардынацыйны савет, які будзе праводзіць рэферэндум аб датэрміновым спыненні паўнамоцтваў Вярхоўнай Рады і прэзідэнта Украіны", – заявіў прадстаўнік аргкамітэту прадпрымальнікаў Аляксандр Данілюк на сустрэчы з апазіцыйным урадам і лідэрам партыі "Бацькаўшчына" Юліяй Цімашэнка.

Паводле яго слоў, сход першай ініцыятыўнай групы па правядзенні рэферэндуму адбудзецца 22 лістапада каля Адміністрацыі Прэзідэнта, нягледзячы на магчымую судовую забарону правядзення такой акцыі.

У сваю чаргу Юлія Цімашэнка паабяцала падтрымку і арганізацыйную  дапамогу сваёй партыі прадпрымальнікам, а таксама ахову і суправаджэнне калон пратэстуючых з Майдана Незалежнасці да Адміністрацыі прэзідэнта.

Фота: Associated Press